A Window in Thrums | Page 5

auntie?"
"Ay, but he juist guessed that; for, though he tried to get oot o' Chirsty
what she wanted the chintz for, she wouldna tell 'im. But I see noo what
she was after. The lad Wilkie 'll be to bide wi' them, and Chirsty had
bocht the chintz to cover the airm-chair wi'. It's ane o' thae
hair-bottomed chairs, but terrible torn, so she'll hae covered it for 'im to
sit on."
"I wouldna wonder but ye're richt, Leeby; for Chirsty would be in an
oncommon fluster if she thocht the lad's mither was likely to hear 'at
her best chair was torn. Ay, ay, bein' a man, he wouldna think to tak off
the chintz an' hae a look at the chair withoot it."
Here Hendry, who had paid no attention to the conversation, broke in--
"Was ye speirin' had I seen Sam'l Duthie? I saw 'im yesterday buyin' a
fender at Will'um Crook's roup."

"A fender! Ay, ay, that settles the queistion," said Leeby; "I'll warrant
the fender was for Chirsty's parlour. It's preyed on Chirsty's mind, they
say, this fower-and-thirty year 'at she doesna hae a richt parlour
fender."
"Leeby, look! That's Robbie Tosh wi' the barrow. He has a michty load
o' luggage. Am thinkin' the minister's bound for Tilliedrum."
"Na, he's no, he's gaen to Edinbory, as ye micht ken by the bandbox.
That'll be his mither's bonnet he's takkin' back to get altered. Ye'll mind
she was never pleased wi' the set o' the flowers."
"Weel, weel, here comes the minister himsel, an' very snod he is. Ay,
Marget's been puttin' new braid on his coat, an' he's carryin' the sma'
black bag he bocht in Dundee last year: he'll hae's nicht-shirt an' a
comb in't, I dinna doot. Ye micht rin to the corner, Leeby, an' see if he
cries in at Jess McTaggart's in passin'."
"It's my opeenion," said Leeby, returning excitedly from the corner, "'at
the lad Wilkie's no to be preachin' the morn, after a'. When I gangs to
the corner, at ony rate, what think ye's the first thing I see but the
minister an' Sam'l Duthie meetin' face to face? Ay, weel, it's gospel am
tellin' ye when I say as Sam'l flung back his head an' walkit richt by the
minister!"
"Losh keep's a', Leeby; ye say that? They maun hae haen a quarrel."
"I'm thinkin' we'll hae Mr. Skinner i' the poopit the morn after a'."
"It may be, it may be. Ay, ay, look, Leeby, whatna bit kimmer's that wi'
the twa jugs in her hand?"
"Eh? Ou, it'll be Lawyer Ogilvy's servant lassieky gaen to the farm o'
T'nowhead for the milk. She gangs ilka Saturday nicht. But what did ye
say--twa jugs? Tod, let's see! Ay, she has so, a big jug an' a little ane.
The little ane 'll be for cream; an', sal, the big ane's bigger na usual."
"There maun be something gaen on at the lawyer's if they're buyin'

cream, Leeby. Their reg'lar thing's twopence worth o' milk."
"Ay, but I assure ye that sma' jug's for cream, an' I dinna doot mysel
but 'at there's to be fowerpence worth o' milk this nicht."
"There's to be a puddin' made the morn, Leeby. Ou, ay, a' thing points
to that; an' we're very sure there's nae puddins at the lawyer's on the
Sabbath onless they hae company."
"I dinna ken wha they can hae, if it be na that brither o' the wife's 'at
bides oot by Aberdeen."
"Na, it's no him, Leeby; na, na. He's no weel to do, an' they wouldna be
buyin' cream for 'im."
"I'll run up to the attic again, an' see if there's ony stir at the lawyer's
hoose."
By and by Leeby returned in triumph.
"Ou, ay," she said, "they're expectin' veesitors at the lawyer's, for I
could see twa o' the bairns dressed up to the nines, an' Mistress Ogilvy
doesna dress at them in that wy for naething."
"It fair beats me though, Leeby, to guess wha's comin' to them. Ay, but
stop a meenute, I wouldna wonder, no, really I would not wonder but
what it'll be--"
"The very thing 'at was passin' through my head, mother."
"Ye mean 'at the lad Wilkie 'll be to bide wi' the lawyer i'stead o' wi'
Sam'l Duthie? Sal, am thinkin' that's it. Ye ken Sam'l an' the lawyer
married on cousins; but Mistress Ogilvy ay lookit on Chirsty as dirt
aneath her feet. She would be glad to get a minister, though, to the
hoose, an' so I warrant the lad Wilkie 'll be to bide a' nicht at the
lawyer's."
"But what would Chirsty be doin' gettin' the chintz an' the fender in that
case?"

"Ou, she'd been expeckin' the lad, of